न आएल अंजोरिया

बरस-बरस कर दिन बीते

बीते न रात अनहरिया

झुरियाएल अब आंख के पपनी

अमावस के बाद ना आएल अंजोरिया

हार के बाद जीत होएला

प्रेम से ही त प्रीत होएला

हाथ से हाथ बढ़ाव त

जग में हर कोई मीत होएला

कहां बा अइसन संसार

जहां मिले अइसन नीक नजरिया

अमावस के बाद न आएल अंजोरिया

जबतक कोनों आस ना रले

तबतक कंठ में पियास न रले

ना रले कोनों अभिलाषा

निष्प्राण मन में विश्वास न रले

उम्मीद कोनों ना टूटे जहां

कहां मिली हमरा उ दुअरिया

अमावस के बाद न आएला अंजोरिया

 कह द जाके कोई स्वप्न न देखे

टूट जाए अइसन उम्मीद न रखे

देह के मरण त एकबार ही होला

मन के मृत्यु न दुनिया देखे

जुग जुग से बंद बा मन इ कोठरिया

अमावस के बाद न आएला अंजोरिया

                          - रवि मिश्रा( 13.10.2013)