ले चल अपना तीर..

ओ रे मांझी
ले चल अपना तीर
जग के घाट पर
बइठल-बइठल
सूखे अंतर नीर

ओ रे मांझी
ले चल अपना तीर...


ना कोई संगी
ना कोई साथी
अब ना रहल कोई मीत
सांस से जीवन
छूटत जाए
जीवन से छूटे धीर

ओ रे मांझी
ले चल अपना तीर...

देह के भार बा
मोह के भार ब
बाटे माया सघन
बोझ सहल ना जाए अब त
माटी भएल शरीर

ओ रे मांझी
ले चल अपना तीर...

                - रवि मिश्रा( 27.10.13)

मनवा चल तू धीरे-धीरे

घाटे-घाटे 
तीरे-तीरे

मनवा चल तू
धीरे-धीरे...

सहर-गांव में
बन फकीरे

मनवा चल तू 
धीरे-धीरे...

आस रहे
विस्वास रहे

पग -पग पर
उल्लास रहे

बाजे झाल
ताल खंजीरे

 मनवा चल तू
 धीरे-धीरे....

भोर भोर में
पोर पोर में

राग रंग में
अंग अंग में

मंद मंद
कुछ मधुर बहे रे

मनवा चल तू 
धीरे-धीरे...

ना सवाल बा
ना जवाब बा

बस खयाल बा
उ कमाल बा

अंगना दुआर आउर
घर के सांझ रे

मनवा चल तू
धीरे-धीरे


                                     - रवि मिश्रा

न आएल अंजोरिया

बरस-बरस कर दिन बीते

बीते न रात अनहरिया

झुरियाएल अब आंख के पपनी

अमावस के बाद ना आएल अंजोरिया

हार के बाद जीत होएला

प्रेम से ही त प्रीत होएला

हाथ से हाथ बढ़ाव त

जग में हर कोई मीत होएला

कहां बा अइसन संसार

जहां मिले अइसन नीक नजरिया

अमावस के बाद न आएल अंजोरिया

जबतक कोनों आस ना रले

तबतक कंठ में पियास न रले

ना रले कोनों अभिलाषा

निष्प्राण मन में विश्वास न रले

उम्मीद कोनों ना टूटे जहां

कहां मिली हमरा उ दुअरिया

अमावस के बाद न आएला अंजोरिया

 कह द जाके कोई स्वप्न न देखे

टूट जाए अइसन उम्मीद न रखे

देह के मरण त एकबार ही होला

मन के मृत्यु न दुनिया देखे

जुग जुग से बंद बा मन इ कोठरिया

अमावस के बाद न आएला अंजोरिया

                          - रवि मिश्रा( 13.10.2013)

फिर से तू आजा....

फिर से सपना कोई दिखा द

फिर से प्यार जता द

सूखल-सूखल डाली पर फिर से

प्रेम के फूल खिला द

फिर आव एक बार सही

कुछ आपन तू मन कह

कुछ हम मन के बात कहीं

फिर से तू जीवन महका द

फिर से हमरा के बहका द

मन के अंगना में फिर से

सुख के एगो दीप जला द

दूर सांझ के बेला देख

भारी-भारी मन हो जाए

अंत के ओर बढ़े सबकुछ

रात के जइसन जीवन हो जाए

फिर से तू चंदा बन के

अंजोरिया में हमरा के नहा द

सांस में जीवन बा हमरा

मन के इ एहसास दिला द

                    - रवि मिश्रा (02.10.2013)