प्रश्न

जे ना पाइल हक-हकूक

सहत रहल रौब-रसूख

जे ना भइल कभी बराबर

भोगत रहल सदा निरादर

उ हृदय ना मनाई जश्न

उ हृदय उठाई प्रश्न

बीतत गएल बरस-बरस

जन-गण के मन तरस-तरस

सिकुड़ल पेट ना भोगे अन्न

ढ़क ना पाएल उघाड़ तन

दरिद्रता के ना लगाई भस्म

उ ह़दय उठाई प्रश्न

चुपचाप न रह पाई उ अब

गुमनाम न बन जाई उ अब

अब समय के धार मोड़ दी

शुष्क शिला पर प्रहार छोड़ दी

ना ढोई शोषण के रस्म

उ हृदय उठाई प्रश्न

रवि मिश्रा- 20.08.13

याद के जंगला

अढ़उल के फूल पर जइसे

भोर बिहाने फिर ओस अंघुआए

बांस के कोपर में जइसे

कोई मुंहवा छुपाए, शरमाए

तन-मन चमक जाए

पियरी माटी से जइसे

सबकुछ गमक जाए

बगईचा के मोजर से जइसे

फगुआ,सोहर,चइता सबकुछ

जइसे बसे फिर हर मन में

परदेस में देस के रंगत

ना छूटे इ तन से

जनसमुद्र के पार कहीं से

जइसे गंगाजी बुलावे ली

जइसे आपन पानी से

मन के रोज भिगावे ली

उहे बथानी, उहे मड़ईया

उहे झुंड, सब साथी भईया

खेत बघार, उ घर दुआर

छूट गईल गंउवा के दुलार

सच सब बा, सब सपना बा

ना होके भी, अपना बा

रह रह के झांके, मन डोले

उड़ जाए के चाह में इ अब

याद के जंगला खोले

           - रवि मिश्रा ( 0908.2013)