भोजपुरी का ह...

भोजपुरी का  ह

परदेस में मजदूर के मन के आसा ह

जौन कान में घुलजाए उ बतासा ह

इ बस बोली ना आपन मन के भासा ह

भोजपुरी का ह

उमंग, उत्साह , जीवन के संचार ह

दिल के गंगा जुबान से बहे उ प्यार ह

आचार ह , विचार ह ,व्यवहार है, आपन संसार ह

भोजपुरी का ह

लड़काई में दुलार के नाम ह

ए संसार में आपन पहचान ह

आन ह, बान ह , सान ह

भोजपुरी का ह

आपन जड़ ह, जवार ह

एगो बंधन हमार तहार ह

पोखर,घाट, बगईचा, अंगना दुआर ह

भोजपुरी का ह

छठ ,दिवाली, ईद, मुहर्रम ह

हर बिदेसिया के मन के मरहम ह

दया, प्रेम ,भाईचारा मेहनत ,परिश्रम ह

भोजपुरी का ह

सरसों, मकई, मसूरिया ,धान ह

खेत में पसीना बहावे उ किसान ह

सबके पेट भरे ओकरा के एगो प्रणाम ह

भोजपुरी का ह

सतुआ-सतुई, अचार , खटमिट्ठी ह

दही ह , चिउड़ा ह , चोखा लिट्टी ह

हर निवाला में प्रेम बा उहे मिट्टी ह

भोजपुरी का ह

माई-बाबू जी के दुलार ह

जीवन में सुख के बयार ह

हमार अस्तित्व ह, हमार आधार ह

-    रवि मिश्रा (29.11.2014)